ديوان الشاعر/ عمر صالح اليافعـــي

[align=center]
شهادتي فيك


شهادتي فيك يالمحبوب مجروحه
لاني احبك وانا بالحيل مغرم بك


كل الصفات الجميله فيك مشروحه
ومنت محتاج من مخلوق يمدح بك


الله عطاك التالق للبشر لوحه
صوره جميله رسمها بالحلا ربك


الطيب والحب والاخلاص مطروحه
مابين نبض الوفا والذوق في قلبك


نفسك عزيزه لنهج الخير مقدوحه
لهلك وناسك وكل من جال في دربك


يا منسل الجود والاكرام والشوحه
يا عالي الاب والاجداد في عربك


سقيتني نبع عطف الحب وسفوحه
وعلمتني الحب قلي كيف ما حبك


انا احبك ونفسي فيك مفضوحه
من كثر ودي وشوقي ولهفتي جنبك


ولو هي التماني على الابواب مفتوحه
اطلب رضا الله وماتمنى سوى قربك[/align]

[align=center]
حسين


للطيب مرسى.. وللرجوله مكانه
وللعز تاج وللمكارم عناويين


شيخ التواضع.. من يوفيه شانه
أنا اشهد انه ينطرح داخل العين


ان قلت شيخ فكلمة الشيخ زانه
باسمه لانه تاجها بالمضاميين


نسل العرب تشهد مواضي زمانه
من ال يافع ما يبي له براهيين


من اليزيدي وافيات(ن) ثمانه
من خير ما جاب العرب ناس وافين


من نسل طالب دام عزه وشانه
الله وهبه العز والطيب وحسين


ابن الاصول وللمخوه ضمانه
سيف(ن) موافي في زمان المجافيين


رمز الشجاعه حين يطلق عنانه
ما توقفه صعبه ولا يوقفه حين


لو بكتب اشعاري بوصفك امانه
ما توفيك يا حسين عدة دواويين


شيخ الكرم شيخ الحكم والرزانه
رمز الرجوله في جميع المياديين


مثل الذهب بس عاد فيك المتانه
ما تنزل بسعرك تساوي ملايين


نجمك يابو طالب تعلا مكانه
نجمك تعلا في سما الطيب والزين


يحفظك ربي ودام عزك وصانه
والله يعميها عيون المعاديين[/align]

[align=center]
سمني بنفسك


آبيـك انتـه تسميـنـي
بشوقي بكـل مـا فينـي

اسامي اختارهـا حسـك
حبيبي.. سمني بنفسـك




انـا الوهـان لعيـونـك
وأنـا بالحيـل مجنونـك

قمر ويدور في شمسـك
حبيبي.. سمني بنفسـك





احب الحـب مـن حبـك
وعاشق لك ومغرم بـك

اموووت بضحكك وهمسك
حبيبي.. سمني بنفسـك




شغلتـك وش تسمينـي
وأنا ويش اللي يرضيني

سوواني ملكها خمسـك
حبيبي.. سمني بنفسـك[/align]

[align=center]
يا خاينه وين الوعود


يا خاينه زيحي الحدود==وين الاماني والعهــود
واحـلام ماتت بالولـود==من بعد هجرك والصـدود
يا خاينه. . . وين الوعود


ارتاح بالك يوم خان==خنتي الاماكن والزمان
وأنا وحبي والحنـان==مثلك لو يعطا جحــود
يا خاينه. . . وين الوعود


ماني على مثلك حزين==حزني على عمر وسنـين
ياليت بس تستاهلـين==من بعض ما قلبي يجود
يا خاينه. . . وين الوعود


من خاننا والله خان==ما عاد نعطيه الامان
ولا بتطريه اللسان==يرجع ويتاسف بــزود
يا خاينه. . . وين الوعود


جيتي وقصدك ترجعين==شملك وشملي تجمعــين
اي والله انك تحلمين==مارجع لو الدنيا ورود
يا خاينه. . . وين الوعود


تبقي لقلبي خاينه==ومنتي لعيني زايــنه
وللحب منتي صاينه==ذكرى من الماضي تعود
يا خاينه. . . وين الوعود[/align]

[align=center]
ما مات زايد . . .


ما مات زايد دام هـو حـي فينـا
من مثل زايد حي بالقلب ما مـات


ننسى كثير... ووالله هو ما نسينـا
وسط الحشا ساكن مع الفكر والذات


رمز الوطن في كل شي لو حكينـا
عنوان واسطوره لكـل الحكايـات


الفضل لله.. ثـم لـه لـو سمينـا
لو ينذكر زايـد ذكرنـا الامـارات


باني الوطن لو لاه هـو مـا بنينـا
زند القبايل والعرب كيف ما جـات


لو شاف وطاءات الزمـن تعترينـا
طول الليالي يسهر الليل مـا بـات


عالي مقامـه خيـر م الله عطينـا
نفخر باسمه في جميـع المجـالات


لو نوصفه ما ننتهـي لـو بدينـا
والحرف يخجل يوصفه نثر وابيات


شيخ الكرم كـف العطايـا امينـا
شيخ الوفا والطيب حاني الملمـات


قلب الحنون.. للصعب شامخ متينا
وجه السموحه والرضا في المقامات


نهج القيم عادات مـن خيـر دينـا
قدوه لنـا منبـع لكـل المسـارات


يرحمـك ربـي كلنـا لـك دعينـا
يجزيك بفعالك جنـان(ن) نعيمـات


ويجعلك ربي ضمن من في اليمينـا
اللي لهم بالصالحـات العظيمـات


ما مات زايد... دام هو حـي فينـا
من مثل زايد حي بالقلب ما مـات[/align]

[align=center]
بوسة العيد


ما عيد.. الا جنب قوم وقبايل
من مثل اصلك ماسك(ن) في مباديك


الطيب والاخلاص واحلا الدلايل
متوارثه بك ساس واركان ماضيك


ابوس خدك يا فريد الخصايل
وشلون اضيع بوسة العيد ماجيك


اجيك يا كرم من مزون(ن) همايل
ويطعم من الرمان لذة حكاويك


اجيك يا سما من في الفكر طايل
يا فكرة(ن) كل الفكر ما تجاريك


اجيك بحساس(ن) من الحب مايل
لك يا بعد قلب اعتنا لك وهاويك


اجيك وانثر نبض قلبي رسايل
نبضات ود ولهفه وشوق بعطيك


اجيك يا نايف ويا حيد هايل
نايف على رؤس العلا من يعاديك


يغلا العرب من المكلا لـ حايل
يغلا البشر في داخلي من يساويك


الذكر يبقى وما عدا الذكر زايل
والله لخلي الكون بالعيد واجيك[/align]

[align=center]
عيد العيد

يهل العيد ويعم الفرح واجيك واعايد
ومدري التهنئه بالعيد لك او بك اهني العيد


يا عيد العيد.. فرحه بفرحتين وعيدي الزايد
على خدك طبعة اربع قبل وان في مجال ازيد


يا كل الحب يا لهفة عمر يا حبي السايد
نسيم العشق يا شمس الضحى يا حالي التنهيد


احاسيس الهوى يا نبض هايم غصب مو رايد
مسير مو مخير مو بكيفي اريد او ما ريد


سكني غصب حبك مو رضا احيد واحايد
لانه صاب سهمك في الحشا واحرمني التنديد


مثل ما قلت لك شلت السلاح وجيت لك صايد
وصادتني عيونك صدتني وان كان قصدي اصيد


بسيطه دامني لك وانت لي مفيود لو فايد
انا ملكك او انته ملك لي ماهمني التحديد


ما دام الحب يجمعنا وذا يعطي وذا جايد
تأكد كل مافي الكون يحسدنا بلا تأكيد


الا يا عيد عيدي يا سعاده يا فرح زايد
الا يا عيد عيدي اعايدك واعايدك واعيد


سنيني اتناشدك وبكل عمري جيت لك شايد
تعال وخل ايام العمر اعياد يحلا عيد[/align]

[align=center]
انت غير الناس لو تعلم


لعنبوا ذا الرمش لا سلهم
يربك الخافق بسلهامه


ينطق الخافي ويتكلم
والنظر يذخر بترجامه


ادعج العينيين ما يرحم
يقتل العاشق تبسامه


مر يا ويلاه لي سلم
واعلن المسبي باسلامه


مد يده ناطقي مبهم
يشبك ابهامي على ابهامه


وانفرد بي قالي يا ابلم
ليش ساكت خابر اعلامه


قلت يا زين الحلا مغرم
منذهل يا باهي القامه


مثلك انته بالحلا معدم
ومثل زينك ماحد(ن) رامه


بدر وجهك والعسل بالفم
جل من سواك بلهامه


سلمك ربي ولي تسلم
فدوتك عمري وايامه


قالي يا شيخ ما نعدم
هالمجامل منك لي دامه


للمجامل قلت ما افهم
وانت فوق الوصف واقلامه


صرت تسري داخلي بالدم
والحشا والروح بك هامه


انت غير الناس لو تعلم
نبض قلبي ومنتهى احلامه[/align]

[align=center] ماء شالله عليك لا رمتك عين ربي يحفظك لنا

ويحفظك لامك وابوك وللذي في الطريق والله

يستاهلك وهذا صاحب فال قوي مبروك عليه

عمر اليافعي هديه ماء بعدها قديه ههههههه

سلمت يدك ابو صالح ولك شكري


الصقر اليافعي[/align]

المشاركة الأصلية كتبت بواسطة الصقر اليافعي [align=center] ماء شالله عليك لا رمتك عين ربي يحفظك لنا ويحفظك لامك وابوك وللذي في الطريق والله يستاهلك وهذا صاحب فال قوي مبروك عليه عمر اليافعي هديه ماء بعدها قديه ههههههه سلمت يدك ابو صالح ولك شكري الصقر اليافعي[/align]

[align=center]يعافيك ربي يا صقر الصقور

مرورك يشرفني

وكلماتك ستبقى بمثابة شهاده لك

اعتز وافتخر بها

تقبل مني اجمل التحايا[/align]