ياهاجسي لاهبت الريح والنود

[align=center]ياهاجسي لاهبت الريح والنود[/align]

[poem=font="simplified arabic,5,blue,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black"]
والنعم بالله دايم اطلبه ويجود=أنا احمده عد السحاب ومطرها
أنا احمده دايم على الفضل محمود=هو خالقي والنفس هو ذي فطرها
ساتر عيوبي جل من كان معبود=الحيد سبح له ويسجد حجرها
والطير يركع والبحر خر بسجود=خوفاً ورهبه جل من هو أمرها
ياهاجسي لاهبت الريح والنود=مرسى جبالك وش يزحزح صخرها
من النفوس اللي بها صرت محسود=سود الليالي لاعبست به خبرها
خابر لهم طيب.. وبالله مسنود=ومن يحفر الحفره لرجله حفرها
ماني بحاقد له اذا صرت محقود=والارض ماتساوت معادن بشرها
هذا على مسك التقاليد مولود=مربي على العادات حين اعتصرها
وهذا على الزلات والشين محدود=فاضح صفاته يوم ربك سترها
بالبيض جازيته وجازاني السود=هول العجايب كيف بس اختصرها
بيدي سقيته لب الاحساس مجرود=وشنع حروبه لاجل حبي نذرها
نجم الثريا للنظر كان مشهود=يصعب وصوله حلم عين وبصرها
وان كان عقلك ناطح اركان وعمود=يسهل وصول العقل لاشياء خسرها
من يمنعك من حلم والحلم مفقود=ان طار عقلك في الحلوم وصورها
على خطى ابناء واباء وجدود=امشي قنوع النفس ماحد(ن) جبرها
من يوم انا طفلاً وانا اقلب العود=واسرح مع افكاري وداعب وترها
واسبح مع احساسي ولي بحر ممدود=والروح بحر من المشاعر غمرها
تهذي سطورك بي وبي ويش مقصود=والبحر في عمقه يخبي دررها
سنة عرب والكذب والزور منقود=عند القبايل يا مبعثر ثمرها
زيف اتهامك لي على ويش مسنود=ورجلي الرزينه صعب مثلك عثرها
تعقد على اللي كان من قبل معقود=ياخف عقلك ما اقتنع من عبرها
يبغي لي اشرح لك ملفات وبنود=عيس القوافي صعب تلحق آثرها
كتبت في ريم الفلا لين العود=لامن بديت بحرف فكري حضرها
له في ثنايا الجوف بركان مفنود=دخان حرفي من سبايب جمرها
والخوف هزات المحبه بي اتسود=ويثور بركاني وخاوي سهرها
ابو العيون اللي به القلب منشود=تسرح عيوني في جماله اسرها
بيني وبين الزين ميثاق وعهود=مانختلف والعين تتبع نظرها
من طيبته تتناثر الارض بورود=ولاداس في موطاه ارض(ن) عمرها
احساسي اني دون ذا الريم موحود=ضايع لوحدي في الحياه وسفرها[/poem]